Deputetja e opozitës së re Rudina Hajdari është marrë në mbrojtje pas deklaratave të saj në Kuvend se është kërcënuar me jetë.
Sipas ABC News, deputetes i është caktuar si truprojë një oficer i policisë parlamentare, i cili e shoqëron në korridoret e kryesisë së Kuvendit.
Hajdari tha në Parlament se në zyrën e saj në ambientet e Kryesisë së Kuvendit e kanë kërcënuar me jetë duke kërkuar të merren masa.
“Para pak ditësh ju kam dërguar një shkresë në lidhje me një kërkesë që ju kërkon të siguroni ambientet e Kuvendit dhe të Kryesisë. Nuk mund të ndodhë sot që në 2019 deputetët të kërcënohen. Është e papranueshme që një femër të kërcënohet nga persona të tjerë. Më kanë ardhur në zyrë e më kanë kërcenuar, merrni masa para se të kemi ndonjë viktimë në parlament. Asnjë deputet mos të hyjë pa u kontrolluar, asnjë deputet të mos marrë me vete persona të tjerë”-tha deputetja Hajdari.