Rusia ka ndërmarrë sulmin ajror më të madh ndaj Ukrainës brenda një periudhe 24-orëshe që nga fillimi i luftës, duke goditur qytete në mbarë vendin me gjithsej 948 dronë.
Më shumë se 400 dronë u lëshuan vetëm pasditen e së martës, në një sulm të pazakontë gjatë ditës, i cili shkaktoi viktima dhe të plagosur të shumtë në Ukrainën perëndimore. Këto goditje erdhën disa orë pas një sulmi të rëndë gjatë natës, që la të paktën pesë persona të vdekur.
Në Lviv, kryebashkiaku Andriy Sadovyi njoftoi se 22 persona janë plagosur dhe paralajmëroi se numri i të lënduarve mund të rritet. Kreu i rajonit, Maksym Kozytskyi, bëri të ditur se manastiri Bernardine, një monument i shekullit XVI i mbrojtur nga UNESCO, ka pësuar dëmtime. Një video e publikuar nga autoritetet lokale tregon një zjarr që përfshin çatinë e një ndërtese banimi pranë manastirit.
Edhe tre qytete të tjera në perëndim të vendit, Ivano-Frankivsk, Vinnytsia dhe Ternopil u vunë në shënjestër të sulmeve.
Drejtuesja e rajonit të Ivano-Frankivsk, Svitlana Onyshchuk, tha se dy persona kanë humbur jetën, ndërsa katër të tjerë, përfshirë një fëmijë gjashtëvjeçar, janë plagosur. Në qytet janë dëmtuar disa ndërtesa, përfshirë edhe spitalin e lindjes.