Rusia dhe Ukraina kanë bërë të ditur se kanë sulmuar objektet energjetike dhe objektivat ushtarake të njëra-tjetrës ditët e fundit. Ministria ruse e Mbrojtjes raportoi të shtunën se Forcat e Armatosura ruse kishin kryer 35 sulme gjatë javës së kaluar, duke përdorur raketa me precizion të lartë të lëshuar nga deti dhe ajri, përfshirë këtu raketa balistike hipersonike Kinzhal dhe mjete ajrore pa pilot për të goditur objektet energjetike dhe ushtarako-industriale të Ukrainës.
Ndërkohë, Shtabi i Përgjithshëm i Forcave të Armatosura të Ukrainës raportoi në të njëjtën ditë se kishte zhvilluar 79 beteja në 24 orët e fundit. Sipas tij, ushtria ukrainase kreu sulme ndaj personelit dhe pajisjeve ushtarake ruse.
Ndërsa komandanti i Forcave Ajrore të Ukrainës tha se forcat ruse lëshuan 34 raketa drejt Ukrainës nga toka, deti dhe ajri nga e premtja mbrëma deri në mëngjesin e hershëm të së shtunës, dhe forcat ukrainase arritën të kapnin 21 prej tyre.
Ukraina tha se objekte të shumta energjetike u goditën nga raketat, duke rezultuar në dëme të rënda. Presidenti ukrainas Volodymyr Zelensky tha se siguria energjetike e Bashkimit Evropian varet nga këto objekte energjetike dhe Ukrainës i duhen të paktën 7 grupe të tjera të sistemeve të mbrojtjes ajrore Patriot për të forcuar aftësitë e saj mbrojtëse.