Tensionet në Gjirin Persik kanë hyrë në një fazë kritike. Nga Haga, kreu i NATO-s, Mark Rutte, konfirmoi se aleatët po bëhen gati për të ndërhyrë në Ngushticën e Hormuzit, pas ultimatumit të Uashingtonit.
Sipas tij, 22 vende, përfshirë anëtarë të NATO-s, por edhe partnerë si Japonia, Australia dhe Emiratet e Bashkuara Arabe, po bashkërendojnë planet për të siguruar lirinë e lundrimit.
“Më lejoni të them se është e rëndësishme që Presidenti dhe SHBA-të po e bëjnë këtë. E di që Presidenti ishte i zemëruar sepse ndjeu se aleatët evropianë kanë qenë shumë të ngadaltë. Lajmi i mirë është se që nga e enjtja, një grup prej 22 shtetesh janë bashkuar për të zbatuar vizionin e tij që Ngushtica e Hormuzit të jetë e lirë dhe të hapet sa më shpejt të jetë e mundur,”shprehet Mark Rutte, Sekretar i Përgjithshëm i NATO-s.
Rutte shpjegoi se operacioni duhet të jetë sekret për të garantuar suksesin e sulmeve të para.
“Shtetet e Bashkuara e kanë planifikuar këtë prej javësh. Për arsye sigurie, ishte e pamundur të ndahej kjo njohuri me aleatët, sepse kjo do të kishte penguar efektin e sulmit të parë, për shkak të rrezikut të rrjedhjes së informacionit. Unë e kuptoj plotësisht pse SHBA-të nuk mundën ta ndanin këtë”.
Ky zhvillim vjen vetëm një ditë pasi Presidenti Donald Trump kërcënoi me shkatërrimin e centraleve energjetike të Iranit, nëse Teherani nuk rihap rrugën ujore brenda 48 orëve. Ndërsa lufta ka hyrë në javën e saj të katërt, tregjet e naftës kanë pësuar luhatje të mëdha.
“Ajo që duhet të bëjmë është të punojmë së bashku, këto 22 kombe. Të përcaktojmë se çfarë nevojitet, kur nevojitet dhe si do ta realizojmë këtë kolektivisht, në momentin që koha do të jetë e pjekur, për t’iu përgjigjur thirrjes së Presidentit”.
Përkundër tensioneve, Uashingtoni ka lehtësuar përkohësisht sanksionet për të lejuar daljen e miliona fuçive të naftës iraniane në tregjet globale, në një përpjekje për të stabilizuar çmimet e energjisë.