Ndërkohë që shumë kuksianë kanë lënë qytetin e tyre dhe kanë emigruar drejt Anglisë, kryetari i Bashkisë, Safer Gjici, ka zgjedhur që të bëjë një takim pikërisht me kuksianët që jetojnë në Londër.
Gjici thotë se në fokus të takimit do të jenë projektet zhvillimore që janë bërë deri tani dhe ndarjet e vizionit për punët e ardhshme që e presin Kukësin.
Në një intervistë për “Euronews Albania”, Gjici tha se këto takime nuk janë në kuadër të fushatës elektorale, ndërsa u shpreh optimist se me investimet në infrastrukturë shumë kuksianë do të kthehen në vendin e tyre.
“Si kryetar bashkie më lind e drejta t’i takoj kuksianët kudo që janë pa nisur edhe fushata zyrtarisht, takimet i kemi raportuar edhe në KQZ. Do shkojmë edhe në vende të tjera jo vetëm në Londër, nuk më ndalon askush të takoj kuksianët kudo që janë. Ne kërkojmë që të na ndihmojnë për investime. Do vijë një ditë që kuksianët do kthehen. Ka shumë që janë kthyer duke investuar në vendin e tyre. Duke krijuar kushte më të mira në infrastrukturë, më shumë kuksianë do të kthehen”, tha Gjici.