Ish-deputeti i Partisë Demokratike, Ervin Salianji, ka kritikuar vendimin e PD-së për të bojkotuar seancën plenare në Kuvend, duke e cilësuar atë si një favor ndaj kryeministrit Edi Rama.
Në një postim në rrjetet sociale, Salianji akuzoi Sali Berishën se po i vjen në ndihmë qeverisë, duke u sjellë, sipas tij, si “bashkëortak” i kryeministrit.
Salianji u shpreh se në kushtet kur qytetarët janë ngritur në protestë dhe janë bërë publike akuza për korrupsion, opozita duhej të ishte e pranishme në Parlament për të ngritur zërin ndaj qeverisë.
“Bojkoti i seancës parlamentare është shërbimi më i madh që mund t’i bëhet Edi Ramës. Në ditët më të zeza të kësaj qeverie, kur qytetarët janë në revoltë dhe aferat korruptive janë ekspozuar njëra pas tjetrës, Sali Berisha zgjedh edhe një herë t’i vijë në ndihmë Edi Ramës, duke u sjellë si bashkëortak dhe pjesë e bashkëqeverisjes”, shkroi Salianji.
Sipas tij, Kuvendi duhej të ishte kthyer në një arenë debati ku qeveria të përballej me kritikat e opozitës dhe shqetësimet e qytetarëve.
Ai deklaroi gjithashtu se interesi personal i Sali Berishës, sipas tij, po pengon Partinë Demokratike të përmbushë rolin opozitar dhe të përfaqësojë qytetarët.
“Prandaj kërkohet ndryshim. Gjithnjë e më shumë qytetarët kërkojnë largimin e dyshes bashkëqeverisëse Rama–Berisha. Ndryshimi do të vijë, sepse tashmë ortakeria e tyre politike është ekspozuar hapur para syve të shqiptarëve”, përfundoi Salianji.