Ministri i Bujqësisë dhe Zhvillimit Rural, Andis Salla informoi sot, se do të ketë adresim të problematikave që lidhen me kontrollet në të gjitha pikat kufitare në vend.
Ministri Salla e bëri këtë deklaratë në përgjigje të problematikave që ngritën grupet e interesit në aktivitetin e organizuar nga Këshilli Kombëtar i Integrimit Evropian.
“Ne jemi duke ndërtuar shtatë laboratorë të rinj në gjithë territorin e Shqipërisë. Ne sot kemi të akredituar nga ISUV, 1945 analiza dhe në laboratorët që ne do të ndërtojmë do kemi mbulim të gjithë sektorëve, në mënyrë që të kemi një raport të detajuar për çdo produkt”, tha Salla.
Sipas Sallës, vitin e kaluar janë eksportuar janë kufijve mbi 320 mijë tonë produkte shqiptare.
“Të gjitha ngarkesat që kanë pasur problematika kanë qenë një numër shumë i vogël. Kjo tregon që ne prodhojmë me cilësi dhe standard për sa kohë eksportojmë në BE, produkt të kontrolluar dhe të certifikuar. Ministria ka ngritur një grup pune ku çdo pikë grumbullimi nuk do vlejë vetëm për problematika që lidhen me eksportin, por do monitorojmë gjithë raportin që grumbulluesi të mos mbetet në një shtet të caktuar po do shkojmë ne, për të parë se ku mund të ndërhyjmë dhe pse është ndaluar produkti”, vijoi ministri Salla.
Njëherësh, Salla bëri me dije se brenda muajit shkurt do të nxirret një urdhër për gjithë inspektimet dhe inspektoratet në terren, që jo vetëm të ndëshkojnë, por edhe të informojnë fermerët për paketën financiare që është vënë në dispozicion nga Ministria.