Në kuadër të samitit të NATO-s, Shqipëria do të jetë një nga 10 vendet themeluese që do të nënshkruajnë marrëveshjen për krijimin e Bankës së Mbrojtjes, një mekanizëm i ri financiar i projektuar për të mbështetur investimet në industrinë e mbrojtjes, teknologjitë ushtarake dhe forcimin e kapaciteteve mbrojtëse të vendeve anëtare.
Nga Ankaraja, gazetarja e RTSH-së, Denada Shkodrani, raportoi se kjo nismë konsiderohet një nga zhvillimet më të rëndësishme të viteve të fundit në fushën e sigurisë euroatlantike. Sipas saj, banka synon të lehtësojë financimin e projekteve strategjike në mbrojtje, inovacion, prodhimin e pajisjeve ushtarake dhe modernizimin e forcave të armatosura të vendeve pjesëmarrëse.
Nënshkrimi i marrëveshjes do të bëhet në mesditën e 7 korrikut, paralelisht me zhvillimet e samitit. Kryeministri Edi Rama merr pjesë në këtë aktivitet i shoqëruar nga bashkëshortja e tij, ministri për Evropën dhe Punët e Jashtme, ministri i Mbrojtjes, drejtuesja e Shërbimit Informativ Shtetëror (SHISH) dhe drejtuesi i kompanisë shtetërore të prodhimit të armëve KAYO.
Pjesëmarrja e Shqipërisë si vend themelues e kësaj nisme vjen në një kohë kur vendi ka rritur angazhimin në fushën e mbrojtjes dhe ka shprehur synimin për të pritur Samitin e NATO-s në vitin 2027.
Përveç krijimit të Bankës së Mbrojtjes, samiti do të fokusohet edhe te rritja e shpenzimeve për mbrojtjen, mbështetja afatgjatë për Ukrainën, forcimi i krahut lindor të Aleancës, zhvillimi i teknologjive të reja ushtarake dhe thellimi i bashkëpunimit në fushën e inovacionit.
Në samit marrin pjesë liderët e 32 vendeve anëtare të NATO-s, si dhe përfaqësues të vendeve partnere, përfshirë Japoninë, Korenë e Jugut, Australinë dhe Zelandën e Re.