Sot u zhvillua ceremonia e betimit të anëtarit më të ri të Gjykatës Kushtetuese, zotit Sandër Beci, në ambientet e institucionit të presidencës së Shqipërisë. Beci e dha betimin e tij para Presidentit të Republikës, Ilir Meta.
Fill pasi u ekzekutua himni kombëtar dhe leximit të vendimit nr.2, datë 15.03.2022, të Gjykatës së Lartë, zoti Sandër Beci u betua para Presidentit Meta, me dorën mbi Kushtetutën e Shqipërisë dhe duke u zotuar se: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”.
Kreu i Shtetit i uroi suksese dhe punë të mbarë gjyqtarit Beci në detyrën e tij tepër të rëndësishme dhe me përgjegjësi të lartë të anëtarit të Gjykatës Kushtetuese.
Të pranishëm në këtë ceremoni solemne të betimit ishin gjithashtu përfaqësues të Kuvendit të Shqipërisë, Gjykatës Kushtetuese, Avokatit të Popullit, Gjykatës së Lartë, Kabinetit të Presidentit, dhe të misionit të ekspertizës OPDAT në vendin tonë, që mbulon çështjet e drejtësisë.
