“Në prag të fundvitit, gjendja e përgjithshme financiare e sektorit bankar paraqitet e shëndetshme, ndonëse presionet e brendshme inflacioniste mbeten sfidë për ekonominë në vitin e ardhshëm.”
Ka qenë kjo deklarata e guvernatorit të Bankës së Shqipërisë, Gent Sejko gjatë takimit përmbyllës me studentë e përfaqësues të mediave.
Gent Sejko: Parashikimet tona për të ardhmen mbeten në territor pozitiv. Mbështetur në ecurinë e favorshme të zhvillimeve ekonomike në vend, si dhe në reagimin e politikës sonë monetare, ne parashikojmë që ekonomia shqiptare do të vazhdojë të rritet më tej gjatë viteve në vijim. Në përputhje me këto pritshmëri, reagimi i politikës monetare do të synojë që kjo rritje të mos përkthehet në inflacion, duke mbrojtur fuqinë blerëse të familjeve shqiptare dhe duke ndihmuar shëndetin e përgjithshëm financiar të ekonomisë.
Guvernatori bëri të ditur se Banka e Shqipërisë ka tashmë si objektiv edukimin dhe përfshirjen financiare të individëve.
Në vijim të fjalës së tij, ashtu siç eshtë kthyer edhe në traditë çdo fundviti, guvernatori Sejko, ndau edhe tre çmimet e konkursit të hapur “Çmimi i Guvernatorit për Diplomën më të Mirë për vitin 2023”.