Ish-kryeministri David Cameron pas emërimit të tij si sekretar i Jashtëm i Britanisë së Madhe, doli në një deklaratë për mediat, duke theksuar se do të fokusohet në mbështetjen e aleatëve dhe forcimin e partneriteteve. Cameron tha se Britania është një vend ndërkombëtar dhe se ata do të bëjnë tregti në çdo cep të globit, duke shtuar se siguria ndërkombëtare është jetike për “sigurinë tonë të brendshme”.
“Ne po përballemi me një sërë sfidash të frikshme ndërkombëtare, duke përfshirë luftën në Ukrainë dhe krizën në Lindjen e Mesme. Në këtë kohë të ndryshimeve të thella globale, nuk ka qenë kurrë më e rëndësishme që ky vend të qëndrojë pranë aleatëve tanë, të forcojë partneritetet tona dhe të sigurojë që zëri ynë të dëgjohet. Britania është një vend ndërkombëtar. Njerëzit tanë jetojnë në të gjithë botën dhe bëjmë tregti në çdo cep të globit. Puna për të ndihmuar në sigurimin e stabilitetit dhe sigurisë në skenën globale është thelbësore dhe krejtësisht në interesin tonë kombëtar. Siguria ndërkombëtare është jetike për sigurinë tonë të brendshme”, tha Cameron.
Cameron vlerësoi gjithashtu edhe punën e Rishi Sunak, duke e cilësuar një kryeministër të aftë. “Ndonëse mund të mos kem qenë dakord me disa vendime të tij, e kam të qartë se Rishi Sunak është një kryeministër i fortë dhe i aftë, i cili po tregon lidership shembullor në një moment të vështirë”, tha Cameron.
Lexo edhe https://tirananews.al/shkundet-qeveria-sunak-rikthen-kryeministrin-e-brexit/
Lexo edhe https://tirananews.al/james-cleverly-merr-postin-e-suella-braverman/