Ndërsa bota pret me padurim emrin e pasuesit të ri të Shën Pjetrit, brenda mureve të Vatikanit ndodh një nga proceset më misterioze në botën fetare: konklavi. Por përveç lutjeve, votimeve dhe heshtjes absolute, ka një pyetje që rrallë shtrohet: çfarë hanë kardinalët gjatë këtyre ditëve, kur mes tyre fshihet Papa i ardhshëm?
Në realitet, konklavi nuk është vetëm një ceremoni shpirtërore, por edhe një përvojë shumë tokësore. Ushqimi përgatitet në shtëpinë e ftuarve brenda Vatikanit – Casa Santa Marta – dhe menuja është e thjeshtë, por e shëndetshme. Supa, mish i zier, peshk i lehtë, perime të stinës dhe fruta janë pjesë e përditshme e tryezës.
Megjithëse nuk ka luks gastronomik, çdo vakt shërben për të ruajtur energjinë dhe qetësinë shpirtërore të kardinalëve. Asnjë pjatë nuk i dedikohet ndonjë kandidati të veçantë, por dikush nga ta-ndoshta ai që po përtyp me përulësi një pjatë rizotoje – do të dalë nga ai konklav si Papa i ri i Kishës Katolike.
Në një botë ku çdo detaj zbulohet, ku ka kamera kudo, konklavi mbetet një nga të paktat mistere të ruajtura – madje edhe kur bëhet fjalë për… darkën.