Në fjalën e mbajtur para Asamblesë Kombëtare të Partisë Socialiste, kryeministri Edi Rama foli për vënien nën sekuestro preventive të planit të investimit për portin e Limianit në Sarandë, aq shumë i kontestuar në media për mënyrën sesi është lidhur marrëveshja.
Sekretari për Programin dhe deputeti i Partisë Demokratike, Arbi Agalliu u shpreh sot se Partia Demokratike ka denoncuar prej kohësh faktin që një pjesë e mirë e politikës së vjetër, pikërisht ata të cilët kanë futur duart në xhepat e shqiptarëve, i ushtrojnë presion sistemit të drejtësisë e veçanërisht SPAK-ut.
“Rasti i fundit është i kryeministrit Rama, i cili në fjalën e mbajtur në Asamblenë e PS-së, tha se vënia nën sekuestro preventive të planit të investimit për portin e Limionit në Sarandë, është absurde. Faktet kanë treguar se në emër të investitorëve strategjikë kanë përfituar klientë të qeverisë apo dhe pjesëtarë të saj, sikurse është rasti i ish-ministres Xhaçka”, tha ia më tej.
Për të çdo sulm kundër SPAK bëhet për të mbrojtur klientët e qeverisë dhe aferat korruptive të saj lidhur me investimet strategjike. ”Kjo nxit dhe hap rrugë që edhe krimi i organizuar të bëjë të njëjtën gjë. Kjo u evidentua disa ditë më parë edhe nga drejtuesi i SPAK. Partia Demokratike mbështet pa kushte sistemin e drejtësisë e sidomos SPAK të vijojnë luftën kundër korrupsionit dhe krimit të organizuar. Partia Demokratike mbështet dhe inkurajon çdo hetim të thelluar, sidomos kundër korrupsionit të politikanëve”, përfundoi ai.