Massimiliano Allegri me Juventus-in do e mbyllin sezonin pa asnjë trofe. Hera e parë që kjo ndodh në dekadën e fundit.
Të mërkurën në mbrëmje, bardhezinjëve u shpëtoi nga dora edhe shansi i fundit, për të marrë një trofe, Kupën e Italisë. Ata u mundën 4-2 nga Inter-i në kohë shtesë. Dhe po nga Inter-i u mundën në janar në Superkupë.
Bordi drejtues i klubit, si dhe Allegri e kanë të qartë që me grupin aktual është e vështirë të rivalizosh dhe të përpiqesh të fitosh diçka.
Në fund të sezonit priten largime të shumta dhe me peshë nga Juventus-i. Paulo Dybala dhe Giorgio Chiellini i kanë zyrtarizuar largimet.
Në pritje për t’u larguar janë edhe Moise Kean, Alvaro Morata, Federico Bernardeschi dhe Aaron Ramsey.
Por, Allegri i ka të qarta idetë se kë lojtar do në Torino, sipas “Corriere dello Sport”.
Për sulmin me interes ndiqen dy emra. Angel di Maria, i cili përfundon kontratën me PSG-në në verë. Dhe “ëndrra” mbetet, Antony, nga Ajax-i. Braziliani kushton rreth 35 milionë euro.
Në mesfushë ka disa emra me peshë si: Paul Pogba, Frenkie de Jong dhe Sergej Milinkovic-Savic. I pari është transferim i lirë në verë. I dyti kushton 75 milionë euro. Dhe serbi kushton midis 50-60 milionë eurove.
Linja e majtë e mbrojtjes është një pikë e dobët e Juventus-it. Dhe aty, Allegri i ka emrat gati. Destiny Udogie nga Udinese dhe Owen Wijndal nga AZ Alkmaar janë favoritët. David Raum nga Hoffenheim ndiqet gjithashtu.
“Zonja e Vjetër” kërkon me çdo kusht të gjejë trashgimtarin e kapitenit, Chiellini. Tre emra janë shfaqur edhe këtu. Benoit Badiashile nga Monako, Josko Gvardiol nga Leipzig dhe Gleison Bremer nga Torino.