Teksa një ditë më parë kreu i shtetit Ilir Meta dekretoi shkarkimin e gjeneral majorit Ylber Dogjani, për shkak të mbarimit të mandatit dhe jo kërkesës së ministres së Mbrojtjes, si përgjegjës për vjedhjen e armëve në bazën ushtarake të Pashalimanit.
Këshilltari për sigurinë kombëtare i Presidentit, Bahri Shaqiri thotë se lirimi i tij nuk ka lidhje me asnjë pretendim tjetër.
“Një nga detyrat kryesore të Presidentit është edhe mbrojtja e integritetit të ushtarakëve nga presionet dhe lojrat politike”, thotë Shaqiri
Lexo edhe- Meta dekreton shkarkimin e gjeneralit të Forcave Detare
Sqarim i Këshilltarit për Sigurinë Kombëtare të Presidentit të Republikës, z.Bahri Shaqiri
Gjeneral Major Ylber Selman Dogjani është shkarkuar nga detyra e Komandantit të Forcave Detare, vetëm për shkak të mbarimit të mandatit.
Lirimi i tij nuk ka lidhje me asnjë pretendim tjetër, të ngritur dhe në disa media, se shkarkimi gjoja lidhet me shkelje ligjore.
Presidenti i Republikës nëse do kishte patur bindjen për një shkelje ligjore sado të vogël nga Gjeneral Major Dogjani, do e kishte shkarkuar atë menjëherë, dhe jo kur të plotësonte afatin e tij në krye të Forcave Detare.
Presidenti Meta shpreson se pasuesi i Gjeneral Major Dogjanit i cili do t’i propozohet në këtë detyrë, jo vetëm të ketë integritetin e duhur, por të jetë plotësisht i karrierës në Forcat Detare.
Një nga detyrat kryesore të Presidentit është edhe mbrojtja e integritetit të ushtarakëve nga presionet dhe lojrat politike.