Futbollisti shqiptar, Xherdan Shaqiri po kalon në një moment shumë të mirë në Angli. Ai kaloi në Liverpool nga Stoke City, që ra në një kategori më poshtë. Megjithatë, më herët Shaqiri ishte pjesë e Bayern Munichut dhe Interit në Itali.
Në skuadrën milaneze nuk kishte kaluar shumë momente të mira. “Një ditë isha i dëmtuar, por duhet të rikuperohesha për të luajtur në ndeshjen tjetër. Te Interi më thanë se ishte një magjistar, një kurues që jetonte në mal. Bëhej fjalë për një person të moshës së tretë, i cili kishte aftësinë të shëronte. Mora veturën, udhëtova 1 orë e gjysmë dhe ai më kuroi, por asgjë nuk më bëri, isha si më parë”, theksoi futbollisti shqiptar.
Në Angli është shumë më ndryshe, sipas tij. “Në Angli është ndryshe, je i lënduar, ke problem, ke shtatë fizioterapistë që të qëndrojnë mbi kokë, të ndjekin hap pas hapi deri sa të shërohesh. Profesionalizmi vjen para së gjithash”, tha ndër të tjera Shaqiri.