Në SHBA kureshtja është e madhe për të gjetur se cili person ka fituar 1.5 miliardë dollarë. Fatlumi ende nuk i ka tërhequr, e për ta bërë këtë ka kohë deri në 21 prill. Bileta është shtiur në Karolinën e Jugut në Shtetet e Bashkuara të Amerikës. Bëhet fjalë për fituesin e çmimit të lotarisë më të lartë në historinë e saj. Bileta fituese u ble në Simpsonvil në muajin tetor.
Rregullat në Karolinën e Jugut janë të qarta: nëse çmimi nuk do të tërhiqet brenda 180 ditësh, ai do të shpërndahet në të gjitha shtetet që kanë marrë pjesë në lotari. Pra fituesi ka kohë deri në 21 Prill.
Miliarderi misterioz, i cili ka fituar vetëm duke shpenzuar dy dollarë, mund të ketë humbur biletën, ose mund të jetë larguar nga Karolina e Jugut. Por pronari i dyqanit që ka shitur biletën fituese shpreson shumë që fituesi të dalë në skenë, pasi ai do të përfitonte 50 mijë dollarë të cilat i ka premtuar se do i ndajë me nëpunësit e tij. Por dhe qyteti i Karolinës së Jugut do të përfitonte 60 milionë dollarë, në rast se paratë do të shpërndaheshin do të merrte vetëm 11 milionë dollar. Pritja ka nervozuar dhe administratën vendore, e cila shpreson se me paratë e fituesit të mbyllë buxhetin e 2019.