Komanda Qendrore e Forcave të Armatosura të Shteteve të Bashkuara për Lindjen e Mesme (U.S. Central Command-CENTCOM) njoftoi sot se ka kryer pesë sulme ajrore gjatë ditëve të fundit kundër organizatës xhihadiste Shteti Islamik (ISIS) në Siri.
Sipas njoftimit, sulmet ajrore janë zhvilluar në periudhën 27 janar – 2 shkurt. Në një prej goditjeve u shkatërrua një depo armësh, e cila u godit me 50 municione precize.
Shefi i CENTCOM-it, admirali Brad Cooper, theksoi se këto operacione “dëshmojnë angazhimin dhe vendosmërinë tonë të vazhdueshme për të parandaluar riorganizimin e Shtetit Islamik në Siri”.
Që nga fundi i vitit të kaluar, forcat amerikane dhe ato aleate kanë intensifikuar operacionet kundër ISIS-it në Siri, si kundërpërgjigje ndaj sulmit të 13 dhjetorit në Palmyra, ku u vranë dy ushtarë amerikanë dhe një përkthyes.