Qeveria amerikane ka rritur presionin ndaj aleatëve dhe Kinës për t’iu bashkuar përpjekjeve të Uashingtonit për të ashpërsuar presionin ekonomik ndaj Iranit. Sipas administratës amerikane, kjo strategji mund të çojë në dobësimin dhe rrëzimin e regjimit në Teheran, pa qenë nevoja për përsëritjen e operacioneve ushtarake.
Ministria e Jashtme e Iranit e ka kundërshtuar ashpër këtë qasje, duke akuzuar Shtetet e Bashkuara për “terrorizëm ekonomik”, sipas agjencisë iraniane IRNA.
Sekretari amerikan i Thesarit, Scott Bessent, paralajmëroi përmes një postimi në X se çdo vend që vijon të mbajë marrëdhënie me Teheranin mund të përballet me pasoja ekonomike. Ai nuk dha detaje mbi masat e reja që Uashingtoni mund të ndërmarrë, por më herët kishte deklaruar se vendet që nuk mbështesin fushatën ekonomike të presidentit Donald Trump ndaj Iranit do të konsiderohen “kundër nesh”.
Bessent pritet të mbajë të hënën një konferencë për shtyp, ku administrata amerikane pritet të shpjegojë hapat e mëtejshëm për rritjen e presionit ndaj Republikës Islamike.
Edhe nënpresidenti amerikan J.D. Vance e ka cilësuar presionin ekonomik si një nga mjetet më efektive që ka aktualisht Uashingtoni ndaj Iranit. Sipas tij, kjo fazë do të jetë “delikate”, pasi edhe Teherani po përpiqet të ushtrojë presion ekonomik ndaj Shteteve të Bashkuara.
Në kuadër të kësaj strategjie, SHBA ka vendosur një sërë sanksionesh ndaj Iranit dhe ka ndërmarrë masa të tjera në rajon. Uashingtoni njoftoi gjithashtu masa të reja ndaj Hezbollahut, për shkak të lidhjeve të tij me Gardën Revolucionare Iraniane.
Ndërkohë, situata në Ngushticën e Hormuzit vijon të mbetet një pikë e rëndësishme tensioni. Sipas të dhënave të monitorimit të trafikut detar, vetëm shtatë anije tregtare e kaluan ngushticën gjatë ditës së enjte, pesë në drejtim të hyrjes dhe dy në dalje, duke reflektuar pasigurinë e krijuar nga përshkallëzimi i situatës.