Administrata e presidentit amerikan Joe Biden shtoi në listën e zezë të tregtisë pesë kompani kineze me supozimin se mbështesin bazën industriale ushtarake dhe të mbrojtjes ruse. Ky vendim këtë të martë vjen në vazhdën e sanksioneve kundër Moskës në lidhje me pushtimin e paprovokuar të Ukrainës.
Departamenti i Tregtisë, i cili mbikëqyr listën e zezë tregtare, tha se kompanitë e synuara kishin furnizuar artikuj për entitetet ruse përpara pushtimit të 24 shkurtit, duke shtuar se ato “vazhdojnë të kontraktojnë furnizimin e këtyre kompanive ruse të sanksionuara.
Agjencia shtoi gjithashtu 31 entitete shtesë në listën e zezë nga vende si Rusia, Emiratet e Bashkuara Arabe, Lituania, Pakistani, Singapori, Mbretërinë e Bashkuar, Uzbekistani dhe Vietnami, sipas regjistrimit të Regjistrit Federal. Megjithatë, nga 36 kompanitë totale të shtuara, 25 kishin operacione me bazë në Kinë.
“Veprimi i sotëm dërgon një mesazh të fuqishëm për subjektet dhe individët anembanë globit se nëse kërkojnë të mbështesin Rusinë, Shtetet e Bashkuara do t’i ndërpresin marrëdhëniet me to gjithashtu”, tha në një deklaratë nënsekretari i Tregtisë për Industrinë dhe Sigurinë, Alan Estevez.