Shtetet e Bashkuara pritet të bëjnë publike një paketë shtesë ndihme ushtarake për Ukrainën prej rreth tre miliardë dollarësh.
Associated Press citon zyrtarët amerikanë të kenë thënë se paketa e re do të bëhet e ditur të mërkurën, ditën kur lufta në Ukrainë arrin kufirin gjashtëmujor.
Paketa e ndihmës me armë prej 3 miliardë dollarësh do të ishte paketa më e madhe e tillë e ndihmës që SHBA ka ofruar për Ukrainën që nga fillimi i luftës më 24 shkurt.
Paratë do të përdoren për të trajnuar dhe pajisur forcat ukrainase për të luftuar për vitet në vijim, si dhe për të financuar kontrata për drone, armë dhe pajisje të tjera që mund të mos shohin frontin e betejës për një ose dy vjet, thanë burimet.