Rastet e shtuara të infektimit me COVID-19, ka berë që ekspertët të rishikojnë edhe një herë masat, duke shmangur në këtë formë izolimin. Shefi i laboratorit të mikrobiologjisë, Andi Koraqi, ishte i ftuar në ‘Dita Jonë’, ku foli rreth situatës së krijuar javët e fundit nga pandemia e koronavirusit, ku janë rritur ndjeshëm rastet e të infektuarve. Koraqi foli dhe për mundësinë e rikthimit të një karantine të dytë. Sipas tij, kjo gjë mund të mendohet vetëm nëse plotësohen të gjitha kapacitetet spitalore.
“Sigurisht që situata po vjen e po rëndohet, por që pritej. Kjo situatë pritej pasi gjatë vjeshtës dhe dimrit, virozat respiratore rëndohen. Këtë gjë ka pësuar dhe Sars-Cov-2. Edhe hapja e shkollave pati një impakt në shtimin e numrave, por gjithashtu dhe fillimi i të gjitha aktiviteteve të tjera ekonomike.
Karantinimi total bëhet në bazë të disa parametrave dhe kryesor është ezaurimi i sistemit shëndetësor. Ne shohim që Italia pothuajse i ka ezauruar këto kapacitete spitalore, dhe për këtë arsye ka ardhur dhe ky “lockdown”.
Franca, Anglia, Gjermania kanë një mbyllje gjithashtu. Te ne kapacitetet nuk janë të ezauruara. Hapëm spitalin Covid 3, kemi dhe spitalin Covid 4 dhe vetëm po u plotësuan këto kapacitete, mund të mendohet për një izolim të ri”, u shpreh Andi Koraqi.