Sekretari i Përgjithshëm i OKB-së, Antonio Guterres, ka dënuar valën e fundit të sulmeve të Rusisë në të gjithë Ukrainën që vranë të paktën tetë persona dhe shkaktuan dëme të shumta.
“Sekretari i përgjithshëm dënon fuqimisht sulmet e sotme në shkallë të gjerë me raketa dhe dronë nga Federata Ruse në disa rajone ukrainase, të cilat thuhet se vranë të paktën gjashtë persona në kryeqytetin Kiev dhe dy persona në qytetin e Çornomorsk”, tha zëdhënësi Stephane Dujarric në një deklaratë.
Sulmet shkaktuan “shumë lëndime midis civilëve dhe dëme në infrastrukturën banesore dhe energjetike, si dhe dëme në ambasadën e Republikës së Azerbajxhanit në Kiev”, vuri në dukje ai.
Guterres përsëriti “thirrjen e tij për një armëpushim të plotë, të menjëhershëm dhe pa kushte si një hap i parë drejt një paqeje të drejtë, gjithëpërfshirëse dhe të qëndrueshme në Ukrainë – një paqe që mbështet plotësisht sovranitetin, pavarësinë dhe integritetin territorial të Ukrainës brenda kufijve të saj të njohur ndërkombëtarisht në përputhje me Kartën e OKB-së, të drejtën ndërkombëtare dhe rezolutat përkatëse të OKB-së”, tha Dujarric.