Zgjedhjet e 30 qershorit kanë nisur të manipulohen, dhe moralisht kanë rënë thotë kreu i LZHK-së, Dashamir Shehi, pas takimit të aleatëve në selinë blu me kreun e PD-së Lulzim Basha.
“Ka filluar manipulimi zgjedhor, zgjedhjet kanë rënë moralisht dhe paraprakisht me letra. Nga denoncimi i këtyre manipulimeve që kanë ndodhur se s’ka më nevojë t’i bëjmë dhe ne”, tha Shehi.
Ai bëri të ditur se aksioni opozitar do të spostohet në shumicë në rrugë por nuk dha detaje për protestën e radhës.
“Aksioni do spostohet në shumicë në rrugë. Sigurisht nuk heqim dorë as nga takimet me ndërkombëtarë, as informacionet me mediat, as takimet e sallave, por aksi kryesor është protesta e rrugës. Këtë do vazhdojmë për sa kohë do i rezistojmë deri në fund. Që të vijë dita që këtu të bëhen zgjedhje siç bëhen në gjithë botën. Siç po e shihni zgjedhje kështu nuk do të bëhen. Ka shumë alternativa, po sigurisht që do t’i analizojmë. Ne nuk bëjmë protestë për protestë siç mendojnë disa, po se po shkelen rregullat e lojës në mënyrë të përsëritur”, vijoi Shehi.