Nexhmedin Shehu, Prefekti i Dibrës mblodhi sot pasdite Shtabin e Emergjencave Civile. Përfaqësuesi i qeverisë për këtë rajon falenderoi Policinë, drejtuesit e shëndetësisë, ato të bashkive dhe institucione te tjera për vëmendjen e treguar gjatë këtyre ditëve të vështira për banorët e Dibrës, Matit e Bulqizës. Drejtuesit e institucioneve kryesore dhe kompanitë e mirëmbajtjes së rrugëve raportuan në lidhje me situatën, dhe masat e marra për përballimin e motit të keq. Situata më problematike është në hapjen e rrugëve rurale dhe lidhjen e fshatrave me rrugët kryesore apo me qytetet, ku sipas autoriteteve rezulton se ende një pjesë e madhe e fshatrave janë nën pushtetin e borës.
Jo të gjitha shkollat janë hapur ditën e sotme, pasi një pjesë e mirë e tyre nuk kanë dru zjarri për ngrohje, por edhe për shkak se nuk lëvizin furgonët që transportojnë nxënësit nga fshatrat e largët.
Prefekti tha se qytetarët duhet të kishin treguar më shumë kujdes për pastrimin e mirëmbajtjen e mjediseve publike.