Prej 1 janarit një sërë shërbimesh kaluan online, dhe kjo ka sjellë frikë tek punonjësit e sporteleve. Kryeministri Edi Rama ka qenë sot në Ministrinë e Infrastrukturës dhe Energjisë ku ka parë nga afër shërbimet publike online.
“Duhet të ndryshojë psikologjia e atyre që punojnë në sportele, është krijuar një ide e gabuar, se do mbyllen sportelet dhe do na heqin nga puna. Sportelet nuk mbyllen por atyre u shtohet puna, se do jenë shërbëtore, e jo si polic trafiku që e ke dosjen në rregull kalo, nuk e ke, nuk kalon, por do ta mbushin vetë”- ka thene Rama.
Kryeministri foli dhe për një VKM që do të miratohet në mbledhjen e sotme të qeverisë që flet për afatet ligjore që duhet të zbatohen.
“Do bëjmë një VKM sot dhe do vendosim afatin ligjor, nëse qytetari aplikon dhe i thua ke 15 ditë për ta marrë, ai do zbatohet, në rast se një dokument shtetëror që duhet të merrej nga brenda administratës mungon, do konsiderohet i dhënë, nuk i thuhet qytetarit prit, por do të gjobitet drejtuesi i zyrës përgjegjëse, nga rroga e tij për shkelje të ligjit. Një herë dy herë, herën e tretë të iki fare. Ndryshe nuk funksionin nëse ne u themi do e plotësojmë dosjen dhe për shkak të mosplotësimit nga ana jonë zvarritet qytetarët, kjo e zhduk radhën dhe zvarritjen”- tha Rama.
