Ministrja e Shëndetësisë, Klodiana Spahiu, konfirmoi se shërbimet e depistimit dhe kujdesit dentar po zgjerohen edhe në zonat rurale.
Përmes Njësisë Lëvizëse Dentare, Spahiu thotë se do tw ofrohet depistim dhe kujdes dentar më pranë vendbanimit të tyre, duke përfshirë edhe zonat ku nuk ka kabinete dentare në shkolla.
“Kujdes dentar më pranë çdo fëmije, kudo ku ai ndodhet.Përmes Njësisë Lëvizëse Dentare, depistimi dhe kujdesi dentar shkojnë më pranë fëmijëve në zonat rurale, duke mbuluar edhe ato zona ku nuk ka kabinete dentare në shkolla. Në bashkëpunim me NJVKSH-të, KSU do të ofrojë depistime edhe për fëmijët me aftësi të kufizuara, duke zgjeruar aksesin në shërbime dhe mundësitë për parandalim e kujdes të hershëm”, shkruan ministrja e Shëndetësisë, në rrjetet sociale.
Sipas Spahiut, në bashkëpunim me NJVKSH-të, shërbimet do të shtrihen edhe te fëmijët me aftësi të kufizuara.
Kjo nismë synon të zgjerojë aksesin në shërbimet dentare, si dhe të krijojë më shumë mundësi për parandalimin dhe identifikimin e hershëm të problematikave të shëndetit oral.
Nisma vjen në kuadër të përpjekjeve për ta bërë kujdesin dentar më të aksesueshëm për fëmijët, pavarësisht zonës ku ata jetojnë.