Qeveria ka vendosur rikthimin e shërbimit të sterilizimit në sistemin publik, duke krijuar një shoqëri aksionare në pronësi të plotë të shtetit. Vendimi, i marrë më 30 dhjetor 2025 dhe i publikuar sot në Fletoren Zyrtare, parashikon krijimin e “Operatorit të Shërbimeve të Integruara të Sterilizimit” (OSHIS sh.a.), me një kapital fillestar prej 200 milionë lekësh.
Shoqëria e re do të ofrojë shërbime të plota sterilizimi në spitalet publike universitare, rajonale dhe bashkiake, duke përfshirë furnizimin me instrumente dhe materiale sterile, menaxhimin e mbetjeve me rrezik biologjik, dezinfektimin e ambienteve, si dhe digjitalizimin e proceseve. OSHIS sh.a. do të administrojë gjithashtu Stacionin Qendror të Sterilizimit në QSUT dhe mund të ofrojë shërbime edhe për subjektet e tjera publike dhe private.
Vendimi i qeverisë vjen ndërsa SPAK ka nisur hetimet mbi kontratën dhe procedurat e dhënies së saj në formë koncesioni, që nga viti 2016, duke përfshirë ish-ministrin e Shëndetësisë Ilir Beqaj, ish-zv. ministrin Klodian Rjepaj dhe biznesmenin Ilir Rrapaj. Pagesa e fundit e parashikuar për koncesionin këtë vit është 500 milionë lekë, ndërsa kostoja totale deri tani ka arritur 15.6 miliardë lekë.
Krijimi i OSHIS sh.a. shënon ndryshimin e modelit të ofrimit të shërbimit të sterilizimit, duke kaluar nga një skemë koncesionare drejt një strukture tërësisht shtetërore. Ministria e Shëndetësisë ka afat 30 ditë për miratimin e statutit dhe regjistrimin e shoqërisë, ndërsa kapitali fillestar do të injektohet pas regjistrimit.
Qeveria synon që kjo nismë të përmirësojë funksionimin e një prej shërbimeve më të rëndësishme të sistemit shëndetësor publik në vend.