Një sherr që degraoi në përplasje fizike ndodhi pasditen e djeshme mes 9 adoleshentëve në ambientet e një berberi në lagjen “1 Maji” në Vlorë.
Edhe pse policia njoftoi se sherri fizik mes tyre, ishte për motive të dobëta, sipas JOQ Albania shkaku ka qënë një vajzë.
Sipas burimeve të JOQ, sherri ku u thyen xhamat e dyert e berberhanes dhe ishin të përfshirë shtetasit K. C., 19 vjeç, F. Sh., 19 vjeç, D. I., 18 vjeç, G. C., 18 vjeç me 5 shtetas të mitur, të moshave 14-16 vjeç, ka ndodhur për shkak të një vajze të quajtur “A”.
Adoleshentët, mes tyre edhe djem biznesmenësh, janë shoqëruar në Komisariat menjëherë pas sherrit me shkopa bejsbolli, por janë lënë të lirë sërish. Madje duke cituar sërish burimet, për të rinjtë e përfshirë në sherr, nuk është hapur as dosje penale.
Ata janë paraqitur sërish ditën e sotme në Komisariat, por kësaj here për të bërë video LIVE në TikTok. Mësohet se adoleshentët janë konfliktuar edhe më parë për vajzën në fjalë, por nuk dihet lidhja që kanë me të.