Mbrëmjen e djeshme deputeti i opozitës në Parlament Kujtim Gjuzi është përzënë nga aktorët e Teatrit Kombëtar dhe aktivistët që janë kundër prishjes së Teatrit. Këta të fundit po qëndrojnë në këto ambiente pasi kanë informacione se godina do të rrethohet me policë.
Duke e konsideruar si provokim vizitën e tij ata nuk e kanë lejuar Gjuzin të qëndrojë aty. Me mjetin luksoz Benz dhe me smoking ai ka shkuar pranë artistëve.
“Nuk ke punë ti këtu! Shiko ata paret që të japin ato! Vjen me Benz në mes të sheshit të Teatrit. Ik more! Ik more, ik ik! Hajde, ik qërohu, ik! Shporru, shporru!”, dëgjohet të thonë disa prej tyre.
Para marrjes së mandatit si deputet, Gjuzi ka qenë disa herë i pranishëm në protestën e artistëve duke mbajtur edhe fjalën e tij para të pranishmëve, por duket se marrja e mandatit si deputet ka bërë që ai të shihet si një ‘tradhtar’ në sy të aktivistëve të djathtë.
Punëtorë të Teatrit Kombëtar disa ditë më parë kanë nisur zbrazjen e Teatrit Kombëtar.