Ministria e Punëve të Brendshme ka shpallur thirrjen për aplikim për pozicionin e Drejtorit të Përgjithshëm të Policisë së Shtetit, në përputhje me ligjin nr. 82/2024 “Për Policinë e Shtetit” dhe Udhëzimin e Ministrit të Brendshëm nr. 160, datë 2.9.2024.
Kandidatët duhet të plotësojnë disa kritere të përgjithshme, duke përfshirë:
-Të kenë një nga gradat e rolit të mesëm drejtues;
-Shtetësi shqiptare;
-Të mos jenë të dënuar për vepra penale;
-Të mos kenë masa disiplinore brenda 5 viteve të fundit;
-Të jenë në gjendje të mirë shëndetësore dhe pa konflikt interesi.
Dokumentacioni i kërkuar përfshin jetëshkrim të përditësuar, platformë personale me objektivat që kandidati propozon të ndjekë, vetëdeklarime për integritetin dhe konfliktin e interesit, dëshmi gjyqësore, dokumentacion për përvojën profesionale dhe rezultate të arritura në studime apo trajnime, si dhe dokument shëndetësor që dëshmon aftësinë për punë.
Kandidatët duhet të dorëzojnë aplikimin brenda 7 ditëve nga shpallja e thirrjes, deri më 11 mars 2026, në adresën postare të Ministrisë së Punëve të Brendshme në Tiranë ose në adresën elektronike: [email protected].
Pas dorëzimit, Komisioni i Posaçëm do të kryejë vlerësimin paraprak të kandidatëve dhe do të organizojë seanca dëgjimore për të gjithë të interesuarit, duke publikuar më pas renditjen përfundimtare të kandidatëve që plotësojnë kushtet ligjore.
Kjo thirrje hap mundësinë për profesionistët e rendit dhe sigurisë që të konkurrojnë për postin më të lartë drejtues në Policinë e Shtetit, duke kontribuar në forcimin e rendit dhe sigurisë në vend.