27 dhjetor 2023, do të futet në kalendarin politik të datave të rëndësishme, kryesisht të opozitës, por edhe më gjerë. Kjo ditë është më intensivja brenda familjes së ish-kryeministrit Sali Berisha.
E nisi i biri, Shkëlzen Berisha i cili u thirr të dëshmojë në GJKKO lidhur me dosjen e “Gërdecit”. Sikurse tha edhe ai “jo rastësisht në këtë ditë, në mëngjes thirret i biri, në drekë jepet masa e arrestit për të atin”.
Dita për Sali Berishën nisi në rrugë, por nuk dihet se ku do të përfundojë. Ish-kryeministri thirri një protestë para Gjykatës së Lartë. Vendimi më i rëndësishëm që pret Sali Berisha është sërish GJKKO-ja, e cila do të vlerësojë kërkesën e SPAK-ut që kërkon “arrest me burg” me mbikëqyrje policore.
Sot nuk ka mbetur pas as e bija e ish-kryeministrit, Argita Malltezi. Ajo është parë në protestë para Gjykatës së Lartë, pasi sikurse thotë, ajo është mbështetëse e Partisë Demokratike, por pa ndonjë ambicie për ta drejtuar atë.