Shkolla 9-vjeçare “Ali Laçej” në Shkodër ka marrë një pamje të re, pas rikthimit të funksionalitetit të hapësirave përreth saj.
Kryeministri Edi Rama, ndau në rrjetet sociale pamje nga shkolla në të cilën janë kryer investime që kanë përmirësuar kushtet për mësimdhënie dhe aktivitete jashtëshkollore.
Sipas Ramës, mjediset e sistemuara tashmë do t’i shërbejnë mësimdhënies, sporteve, arteve, zejeve dhe aktiviteteve komunitare, në dobi të mbi 150 nxënësve, mësuesve dhe gjithë komunitetit përreth shkollës.
“Një shkollë e bukur, me një pamje të re dhe mjedise të sistemuara. Shkollës “Ali Laçej” në Shkodër i është kthyer funksionaliteti i hapësirave rreth saj në shërbim të mësimdhënies, sporteve, arteve, zejeve dhe aktiviteteve komunitare për mbi 150 nxënës, mësues e gjithë komunitetin”, shkruan Rama.
Hyrja e shkollës ishte bllokuar nga disa hekura, lavazhe dhe motorë uji të braktisur prej vitesh aty. Lirimi i hyrjes së saj u krye në shtator në kuadër të operacionit për lirimin e hapësirave publike.