Është shpallur këtë të premte projekti fitues për Auto Moto Parkun e parë shqiptar.
“Bazuar në cilësitë e propozimeve lidhur me programin, përvojën e përdoruesit, operacionet, e fleksiblitetin të përdorimit juria njëzëri arriti në përfundimin se propozimi më i mirë u paraqit nga Test and Training International Wurz Design, përgëzime”, tha arkitekti Beat Huesler.
Në garë për Auto Moto Parkun e parë shqiptar ishin 4 studio ndërkombëtare. Ato kanë marrë pjesë më parë në projektimin e mbi 200 pistave automotosporti në botë. Auto Moto Parku i parë shqiptar do të ngrihet në Krastë të Elbasanit.
Punimet për Auto Moto Parkun e parë shqiptar pritet të nisin brenda verës së këtij viti dhe parashikohet të zgjasin 3 vjet. Si pjesë e këtij investimi, parashikohet të ngrihet dhe muzeu i parë “Retro”, pista e parë e garave auto-moto të certifikuar nga FIA dhe struktura të tjera shumëfunksionale buzë shëtitores së re, për pedalim dhe sporte të tjera.
E gjithë gjurma e motoparkut është 600 mijë metra katrorë. Projekti po asistohet dhe nga Federata Ndërkombëtare e Automobilizmit, Presidenti i të cilës, Jean Tod përshëndeti konkursin që u zhvillua sot përmes një videomesazhi.