Shumë sektorë të vendit nesër do të përfshihen nga një valë grevash e protestash pasi sindikatat përshkallëzojnë lëvizjet e tyre për aksidentin e trenit në Tempi, me kërkesë kryesore sigurinë e transportit të qytetarëve.
Kryeqyteti Athinë si dhe Selaniku, do të jenë për disa orë pa Mjetet e Shërbimit Publik, mësuesit do të jenë në grevë, nëpunësit e Operatorit Hekurudhor po ashtu, anijet do të jenë të ankoruara në portet e vendit, ndërsa Konfederata e Nëpunësve të Administratës Publike ADEDY ka bërë thirrje për një miting të madh në qendër të Athinës.
Në kërkesat e tyre sindikatat që organizojnë grevën kërkojnë që t’i ngarkohen përgjegjësitë reale kujtdo, sado post të lartë të ketë, në mënyrë që krimi i Tempit, siç e karakterizojnë aksidentin hekurudhor me 57 viktima, shumica të rinj, të mos kalojë në harresë dhe që të ndalohet politika e privatizimeve, e cila vendos mbrojtjen e jetës njerëzore në bilanc me fitimin dhe kostot.
Gjithashtu farmacitë do të mbyllen për disa orë, autobusët dhe trolejt nuk do të qarkullojnë në Athinë pasi Sindikata e Punëtorëve të këtij sektori bën thirrje për transport publik të sigurt dhe modern dhe masa për sigurinë e punëtorëve dhe pasagjerëve. Marrin pjesë në grevë edhe nëpunësit e kompanisë Hellenic Train që janë në grevë edhe sot edhe nesër. Nuk merr pjesë në këtë lëvizje të fuqishme sindikata e nënpunësve të sektorit privat GSEE ,ndërsa do të jetë tepër e fuqishme pjesëmarrja e grupeve studentore.
Ndërsa vala e zemërimit është rritur dhe gjithkush kërkon sa më shpejt të zbardhen shkaqet e tragjedisë së përplasjes se dy trenave javën e kaluar, hetimet kanë filluar me ritme të shpejta , ndërsa bashkë me shigjetimet politike mes qeverisë dhe opozitës dalin në pah edhe dobësitë dhe mangësitë prej shumë vitesh në mënyrën e menaxhimit të operatorit shtetëror të hekurudhave në vitet e kaluara, por edhe gjatë katërvjeçarit të fundit.