Presidenti i Federatës Shqiptare të Futbollit, Armand Duka, është shfaqur i emocionuar pas fitores 3 me 0 të Shqipërisë ndaj Çekisë. Duke folur për mediat, Duka tha se fitorja e kuqezinjve është mëse e merituar. Tashmë, sipas Presidentit të FSHF, kombëtarja është më shumë se me një këmbë në Gjermani drejt Euro 2024.
“Padyshim që kisha shumë emocion para ndeshjes. Ishte ndeshje shumë e vështirë. Çekia para ndeshjes ishte shumë e fortë, por tani duket sikur ishte shumë e lehtë. E merituam, e stërmerituam. Jam shumë i lumtur. Jam shumë i lumtur për këtë 3-pikësh të rëndësishëm që na bën të jemi pothuajse me më shumë se me një këmbë. Jam shumë i gëzuar që shkojmë, ekipi e meritoi”.
Duka vlerësoi edhe punën e trajnerit Sylvinho për frymën e grupit që ka krijuar në skuadër.
“Sekreti i kësaj skuadre është tamam skuadra dhe jo individët. Pavarësisht se kemi një individ që vërtetë na ka bërë 3 gola, që është Jasir Asani”.