Shqipëria do të përfitojë një tjetër fond prej 61 milionë eurosh për sektorin energjetik, në kuadër të Planit të Rritjes së Bashkimit Evropian.
Ministri i Energjisë, Enea Karakaçi, deklaron se fondet janë përfituar si rezultat i reformave të ndërmarra në sektor gjatë këtij viti.
Financimi nga Plani i Rritjes do të përdoret për të mbështetur investimet, zhvillimin ekonomik dhe procesin e integrimit evropian. Një ndër reformat më të rëndësishme të vendit konsiderohet rritja e kapaciteteve prodhuese të energjisë nga burimet e rinovueshme.
Nga gjashtë vendet aspirante për anëtarësim në Bashkimin Evropian, vetëm tre kanë arritur të përfitojnë nga Plani i Rritjes, bazuar në përmbushjen e reformave të përcaktuara.
Shqipëria vijon të renditet në krye të rajonit për përfitimet nga ky plan. Deri në maj të vitit 2026, vendi ka përfituar 212 milionë euro, ndërsa vlerësohet se, pavarësisht polarizimit të lartë politik, shumica e stabilizuar qeverisëse ka mundësuar zbatimin e reformave dhe përmbushjen e kritereve të kërkuara nga BE-ja.
Në anën tjetër, Kosova, Serbia dhe Bosnje-Hercegovina nuk kanë mundur të përfitojnë fondet e parashikuara, për shkak të krizave politike dhe mosplotësimit të kushteve të kërkuara.