Për rreth nëntë orë, fluturimi i Sead Nikajt nga Stambolli për në New York ishte i qetë.
Mirëpo, sapo avioni u afrua në Maine, nisën turbulencat e forta. Nikaj ka thënë për New York Times se pa një grua pranë tij të fluturojë nga sendilja e saj dhe maskat e oksigjenit ranë nga tavani.
Për rreth 10-15 minuta, gjendja ishte e tmerrshme dhe pasagjerët menduan se do të vdisnin.
“Unë thashë: O Zot me ndihmo”, tregoi ai duke zbuluar detaje nga tmerri që përjetoi kur avioni hasi në masa ajrore të forta dhe humbi ekuilibrin. Shqiptari rrefeu se pas kësaj që përjetoi sot nuk do të fluturojë më kurrë.
Avioni u ul në aeroportin Kennedy, dhe rreth 30 persona u dërguan në spital me lëndime jo të rrezikshme për shkak të turbullirave, thanë autoritetet.
Steve Coleman, zëdhënësi i Autoritetit të Portit të New York-ut tregoi se një mjek theu këmbën gjatë fluturimit.
Ndërsa, në pistën ku ndaloi avioni, pasagjerët zbritën të gjakosur e të tmerruar. Me dhjetëra ambulanca erdhën aty për t’i dhënë të dëmtuarve ndihmën e parë mjekësore.