Xhevat Fana ishte koreograf dhe kompozitor i talentuar i Shtëpisë së Kulturës dhe Krijimtarisë Popullore të qytetit të Peshkopisë, i ansamblit “Dibra” dhe i Estradës së qytetit. Ai qe instrumentist virtuoz, i binte shumë mirë çiftelisë dhe sharkisë. Qe një artist i lindur dhe i kultivuar. Fama e tij arriti deri në Dizhon të Francës dhe në skenat e tjera europiane. Mbi të gjitha qe njeri. I dashur dhe gojëmbël. Qe i shoqërisë dhe i punës. Ishte nj qytetar vërtetë model i qytetit të Peshkopisë dhe dhe një familjar i përkushtuar.
Xhevati vërtetë u nda nga kjo jetë, nga familja, farefisi, kolegët, miqtë dhe të njohurit e tij, por ai është në zemrat dhe mendjet e tyre, është në shpirtin e të gjithë të njohurve si njeriu i mirë, artisti shumëdimensional dhe njeri me vlera. U lind më 1948, në Shumbat të komunës së Sllovës. Kishte kryer studimet në Institutin e Lartë të Arteve (Sot Akademia e Arteve të Bukura), ku është diplomuar për koreografi. Aktivitetin tij e ka kryer pranë Shtëpisë së Kulturës “Haki Stërmilli “ të Peshkopisë, me Ansamblin “Dibra” dhe është aktivizuar edhe nga Ansambli Shtetëror i Këngëve e Valleve Popullore, sidomos në turnetë jashtë vendit, si në Dizhon të Francës.
Në interpretimin e valles popullore kishte kontribut të veçantë, pasi krijoi një traditë me emër në Dibër. Punoi pa u lodhur me brezin e ri për t’i bërë talente të valles popullore dibrane. Ishte ftuar në disa veprimtari artistike në Kosovë e Maqedoni. Ka krijuar edhe shumë këngë popullore me motive të Dibrës. Për merita në fushën e kulturës është dekoruar me medaljen “Naim Frashëri”, me Çmimin e Karrierës dhe me diplomën “Mirënjohje” me motivacionin: “Për kontribut të shquar në interpretimin dhe krijimin e Valles Popullore”. /Gazeta Dibra/