Prej datës 9 Shtator automjetet që qarkullojnë në vendin tonë do i nënshtrohen kolaudimit të dyfishtë.  Në terren ka zbritur pajisja, e cila bën kontrollin për frenat, ndriçimin, ndotjen si dhe peshën. Nga verifikimet në terren ka rezultuar se problematikë kryesore qëndron mbipesha e automjeteve, duke sjellë edhe shkatërrim të rrugëve në vend, por nuk mungojnë edhe ato të sistemit të frenimit si dhe të ndotjes.

“Kemi parasysh që kemi hasur automjete pa kolaudim, kemi bërë dhe ne kontrollin teknik dhe kemi patur problematika në lidhje me sistemin e frenimit, një pjesë e madhe janë mbipeshat si dhe dokumentacione të ndryshme që ne i kontrollojmë në terren nga legjislacioni”, tha Elton Haxhi, Shef i Task-Forcës për Transportin Rrugor.

Vetëm për dy orë grupi i Task-Forcës ka vendosur mbi 10 akt konstatime.

“Këto 10 akt konstatime janë mbajtur në një hark kohor prej 2 orësh. Ne evidentojmë shkeljen, mbajmë akt-konstatimin dhe pastaj referojmë tek komisioni administrativ masat. Komisioni vlerëson shkeljet dhe vendos dhe masën administrative.”

Ky aksion i policisë rrugore së bashku me task-forcën e transportit rrugor do të shtrihet në 6 pika të vendit dhe synon minimizimin e ndotjes nga automjetet dhe rritjen e sigurisë rrugore. Skanerit të kontrollit do i nënshtrohen linjat qytetëse, ndërqytetëse, transporti i udhëtarëve dhe transporti i mallrave.