Albert dhe Edmond Nela janë dy vëllezërit që kërkoheshin të vriteshin nga Luan Sadria alias Ismail Zeneli, i cili kishte pajtuar Bujar Gërmizin për eleminimin e tyre.
Ata dyshoheshin se në 2013 në Britani kishin vrarë Guximtar Sadrinë vëllanë e Luan Sadrisë, i cili atje kishte emrin Xhem Krasniqi.
Në shenjë hakmarrje, ai kërkon eliminimin e tyre dhe këtë e merr përsipër Bujar Gërmizi, i arrestuar nga policia me urdhër të SPAK që goditi një grup kriminal pas zbërthimit të aplikacionit “Sky”.
Në kuadër të këtij operacioni u arrestuan Dedan Gjoni, oficer policie dhe Erzen Breçani, ish-zyrtar i policisë, si dhe u shpallën në kërkim Ervin Mata, djali i Erzen Breçanit, Eralbi Breçani si dhe disa persona të tjerë.
Sipas dosjes hetimore, Dedan Gjoni, shefi i krimeve në Komisariatin nr.6, ka përdorur sistemet e Policisë së Shtetit, në të cilat ka patur akses për shkak të detyrës që ushtronte, në shërbim të qëllimeve të paligjshme te shtetasit Ismail Zeneli.
Gjoni kryen veprime aktive duke ndjekur motrën dhe nënën e dy vëllezërve, tenton t’iu vërë GPS në makinë, ndërsa nxjerr nga sistemi TIMS të dhënat për Albert dhe Edmond Nelën.
Operacioni i nisur pak ditë më parë është shtrirë edhe në Spanjë, pasi dyshohet se disa persona të shpallur në kërkim jetojnë atje.