Mjekë dhe infermierë të Drejtorisë Vendore të Shëndetit Publik Mat një ditë më parë nisën hetimet në fshatin Batër e Vogël, njësia administrative Komsi.
Ata kishin “zbuluar” se një vajzë 16 vjeçare kishte ardhur 10 ditë më parë nga Fushë Kruja në fshatin e lindjes, ndërkohë që bashkë me të nënën e saj ishin vendosur prej disa vitesh në Fushë Krujë. Kjo e fundit punonte në një fasoneri të qytetit.
Një natë më parë tamponi i adoleshentes dhe familjarëve të tjerë u dërguan në laborator dhe sot në mëngjes 16 vjeçarja rezuloti me Covid 19 pozitiv. Ndërsa pjestarët e tjerë të familjes rezultuan negativ.
Mjekët thanë se vajza nuk ka paraqitur probleme për shëndetin. Nuk ka pasur temperature, këputje, të vjella, dhe as shqetësime të tjera. Madje mendohet se ajo mund të jetë prekur dy javë më parë në Fushë Krujë. Mësohet sakaq se ajo nuk ka pasur kontakte me banorë të tjerë të fshatit.
Sot autoritetet vendore të shëndetësisë dhe Bashkisë Mat kanë marrë masa të plota për karantinimin e familjes në Batër të Vogël si dhe furnizimin e pjestarëve të familjes me ushqime e medikamente. Po ashtu DVSHP Mat ka kryer dezinfektimin e banesës ku rezultoi rasti i parë me koronavirus në këtë rreth.