Nën mbikqyrjen e presidentit Emmanuel Macron, Franca ishte vendi organizator e pritës i samitit informal mbi sigurinë evropiane dhe luftën në Ukrainë, që u zhvillohet në Paris, pasditen e kësaj të hëne.
Ky takim mblodhi në Elysée 11 liderë evropianë, mes tyre kryeministrin britanik Keir Starmer, kancelarin gjerman Olaf Scholz, kryeministrin spanjoll Pedro Sanchez dhe Sekretarin e Përgjithshëm të NATO-s, Mark Rutte. Kryeministri polak, Donald Tusk, mbërriti me vonesë, ndërsa e fundit që iu bashkua samitit ishte kryeministrja italiane Giorgia Meloni.
Ukraina kërkon që Evropa të caktojë sa më shpejt një përfaqësues për negociatat e mundshme të paqes me SHBA-në dhe Rusinë. Presidenti amerikan Donald Trump deklaroi se një takim mes tij dhe presidentit rus Vladimir Putin mund të ndodhë së shpejti. Ai shtoi se si Kremlini, ashtu edhe Zelensky, duan që lufta të përfundojë sa më parë. “Ata duan që lufta të marrë fund dhe sa më shpejt,” tha ai, duke mohuar se Putin ka synimin të pushtojë të gjithë Ukrainën.
“Jo, mendoj se ai dëshiron të ndalet”,-u shpreh Trump. Takimet diplomatike për t’i dhënë fund luftës po intensifikohen. Nesër në Riad do të zhvillohet një takim mes ministrit të Jashtëm të Rusisë, Sergei Lavrov, dhe Sekretarit amerikan të Shtetit, Marco Rubio, ndërsa të mërkurën atyre do t’u bashkohet edhe presidenti ukrainas Volodymyr Zelensky.