Deputeti demokrat, Arbi Agalliu i ka kërkuar sqarime nga foltorja e Kuvendit ministrit të Mbrojtjes, Niko Peleshi lidhur me menaxhimin e situatës së zjarreve në vendin tonë.
Para se t’i drejtohej Peleshit me disa pyetje, ai deklaroi se zjarrfikësit po punojnë me mjete rrethanore për shuarjen e flakëve në ishullin e Sazanit. Madje, sipas tij, atyre iu është ndaluar që të bëjnë foto nga vendi i ngjarjes.
“Janë 18 zjarrfikës në Sazan që po luftojnë me mjete rrethanore. U është ndaluar nga shefat e tyre të nxjerrin fotografi. Ata nuk kanë mjetet më minimale për fikjen e zjarrit. Kjo është evidente nga fotot e dërguara nga vendi i ngjarjes. Kam disa pyetje për ministrin. Çfarë është bërë nga zjarret e vitit të kaluar e deri më sot. Ku mund të ishte hequr mënjanë një sasi e caktuar parash vetëm për këto ditë. Kryeministri kishte nxjerrë një postim që pritet të jetë sezon i nxehtë dhe mos e nxehni më nga tastiera. A ka sot pushues në Vlorë që nuk thith ajrin nga flakët e Sazanit. Vetë drejtuesit e operacionit kanë thënë që përbën rrezik për punonjësit në terren.”