Kryetarin e Partisë së Lirisë, Ilir Meta mesaduket do ta shohim më shumë në terren, sesa në zyrë. Paraditen e kësaj të marte, në një prononcim për mediat nga Shijaku, akuzoi me tone të forta qeverinë “Rama 3”, duke ripërtëritur akuzat se qeveria po vjedh lekët e inceneratorëve, ndërsa nga ana tjetër tymi që vjen nga djegia e mbeturinave po dëmton shëndetin e qytetarëve.
“Shijaku duhet të jetë modeli i agro-turizmit. Kështu vepron mafia, merr lekët e plehrave dhe i djeg ato në mënyrë më kriminale, duke rrezikuar shëndetin dhe jetën e fëmijëve dhe të banorëve. Kjo nuk mund të ndodhte kurrë në një vend europian. kjo ndodh këtu se këtu qeveris mafia e incenetatorëve. Këtu bëhet terror ndaj njerëzve, që mos të njoftojnë mediat, apo të njoftojnë politikanët. Edhe i vjedhin, e dhe i shtypin, Kjo kohë ka përfunduar. I bëj thirrje të gjithëve që të reagojnë ndaj kësaj mafie që po shkatërron këto pasur të jashtëzakonshme që ka Shijaku dhe që po sulmon në mënyrë barbare shëndetin e këtyre njerëzve të mrekullueshëm”, tha Meta.
Nga ana e saj, Policia e Shtetit bëri me dije se është arrestuar 45-vjeçari, i cili u kap duke djegur goma, sedilje makinash dhe mbetje të tjera plastike, me qëllimin nxjerrjen e materialeve metalike. Kryetari i Bashkisë, Elton Arbana, tha se gjatë natës iu vihet flaka qëllimisht mbeturinave, që të akuzojnë më pas Bashkinë si fajtore.
“Ujërat e trazuar qëndrojnë në llumin ku burojnë. Ashtu siç kishte paralajmëruar opozita, muaji shtator do të jetë muaji i sulmit dhe ja ku ndodhi një zjarrvënie e qëllimshme në kontenierët e mbetjeve urbane në njësinë administrative Gjepalaj. Sapo morëm informacion dërguam grupin e zjarrfikëseve, sektorin e shërbimeve dhe të gjitha masat e duhura për të mbajtur në kontroll situatën dhe për të mos lejuar përhapjen e mëtejshme të zjarrit. Pavarësisht çdo qëllimkeqi që na del përpara ne do të vazhdojmë punën tonë me këmbëngulje, vullnet dhe përkushtim për të përmbushur detyrimet ndaj qytetarëve të cilëve i shërbejmë. Opozitës i mbetet të paktën të mësojë nga gabimet e së shkuarës dhe se ku duhet ta drejtojnë pasionin dhe furinë e tyre politike, pa dëmtuar qytetarët. Ku ka vullnet, ka zgjidhje”.