Ministrja e sapoemëruar në qeverinë e re të presidentit francez, Emmanuel Macron është nën hetim për përdhunim.
Chrysoula Zacharopoulou është subjekt i dy akuzave të ngritura nga një grua, të cilës nuk mund t’i bëhet publik emri për arsye ligjore.
Sipas revistës Marianne, që zbuloi këtë çështje, veprat për të cilat ajo akuzohet, janë kryer në periudhën kur ajo ushtronte profesionin si gjinekologe.
Sipas informacioneve të cituara nga revista franceze “Marianne”, ndaj 46-vjeçares Chrysoula Zacharopoulou janë ngritur dy akuza për përdhunim.
Ankesa e parë është bërë më 25 maj. Zyra e prokurorit të Parisit i tha revistës Marianne se një hetim kishte nisur dy ditë më vonë, më 27 maj.
Sipas informacioneve të konfirmuara nga Prokuroria e Parisit, padia e dytë është ngritur më 16 qershor. Vlen të theksohet se të dyja ngjarjet duket se kanë ndodhur në zyrën e mjekes në vitin 2016 ndaj një gruaje.