Në shkelje të hapur të procedurës, Komisioni i Pavarur i Kualifikimit ka zhvilluar seancë për subjektin e rivlerësimit Entela Shedula, me detyrë gjyqtare dhe kryetare e Gjykatës së Shkallës së Parë Kavajë.
Edhe pse procedura e ka të saktësuar mjaft qartë se si zhvillohet një seancë e rregullt vettingu, treshja e anëtarëve Xhensila Pine, Suela Zhegu dhe Brunilda Bekteshi kanë vijuar punën. Seanca e sotme e KPK u zhvillua pa sekretari gyqësore edhe pse ajo është një pjesë e rëndësishme përbërëse e trupit gjykues, raporton tirananews.al.
Prezenca e sekretarit gjyqësor në zhvillimin e seancave gjyqësore përbën domosdoshmëri, për arsyen e thjeshtë sepse është pikërisht ai që dokumenton nëpërmjet procesverbalit çdo gjë që ndodh, thuhet dhe vendoset në seancë.
Gjithashtu, vendimi i arsyetuar bazohet pikërisht në procesverbalet e mbajtura për efekt të zhvillimit të procedurës përkatëse.
Në momentin e çeljes së seancës, kryesuesi i trupit gjykues verifikon prezencën e të gjithë anëtarëve të trupit gjykues, atë të sekretarit gjyqësor e më pas të palëve pjesëmarrëse në proces.
Me sa duket trupi gjykues në këtë rast është mjaftuar me verifikimin e prezencës së vet, dhe nuk i ka kushtuar rëndësinë e duhur prezencës së sekretarit gjyqësor, duke harruar që kjo passjell pavlefshmërinë e çdo procesverbali të mëvonshëm që ky trup gjykues mund të mendojë se do të bëjë në të ardhmen për këtë seancë.
Komisioneret e KPK-se janë zgjedhur nga Kuvendi me qëllim kryerjen e procedurave të rivlerësimit të gjyqtarëve dhe prokurorëve në Shqipëri. Ndër të tjera, rivlerësimi përfshin edhe aspektin profesional. Mirëpo në këto kushte lind pyetja: me të tilla mangësi në formimin juridik, anëtarët e trupit gjykues në seancën e sotme, a i kanë kreditet e mjaftueshme për të kryer një procedurë rivlerësimi të tillë?
Ishte e habitshme se si as subjekti i rivlerësimit nuk e vuri në dukje këtë fakt. Mbetet për të parë zhvillimet në vijim nëse ai do të paraqesë ndonjë kërkesë për pavlefshmëri të kësaj seance të zhvilluar në kundërshtim me ligjin. Trupi gjykues i përbërë nga komisionerët Xhensila Pine, Brunilda Bekteshi dhe Suela Zhegu, vendosi në këtë seancë shkarkimin e gjyqtares Entela Shedula nga detyra. /tirananews.al