Presidenti i Ukrainës, Volodymyr Zelensky shkarkoi të mërkurën zëvendëskryetaren e zyrës presidenciale, Iryna Mudra, pasi organet e drejtësisë nisën një operacion të madh që synonte një organizatë të dyshuar kriminale dhe që përfshinte politikanë dhe zyrtarë të lartë qeveritarë.
Mediat ukrainase raportuan se Byroja Kombëtare Kundër Korrupsionit (NABU) kishte kontrolluar ambientet e lidhura me Mudrën dhe anëtarin e parlamentit Vadym Stolar.
Autoritetet thanë se po kryenin një operacion për të zbuluar atë që e përshkruan si një “organizatë kriminale që vepronte nën udhëheqjen e një deputeti aktual dhe një ish-deputeti ukrainas dhe që përfshinte zyrtarë të lartë në zyrën presidenciale” dhe të tjerë.
Të dyshuarit akuzohen për pastrimin e 150 milionë hrivnias, ose rreth 3.4 milionë dollarë. Sipas NABU-së , paratë ishin paguar si garanci për një të dyshuar në një rast të veçantë korrupsioni.
Hetimi, i quajtur “Forest Gump”, është hetimi i fundit për korrupsion që ka arritur në administratën e Zelensky.
Mudra është përgjegjëse për çështjet ligjore dhe reformën gjyqësore në zyrën presidenciale. Më parë ajo ka shërbyer si zëvendësministre e drejtësisë.