Kalon për gjykim dosja në ngarkim të ish-kryebashkiakut socialist të Kukësit Safet Gjici dhe Alma Kaçiz. GJKKO me trupë gjykuese Atalanta Zeqirin, ka pranuar kërkesën e përfaqësueses së akuzës Manjola Kajana për ta kaluar dosjen për gjykim për veprat penale ”korrupsion pasiv” sa i përket Gjicit dhe ”korrupsion aktiv” për Kaçin.
Në seancën me dyer të mbyllura, Kaçi tha se kishte sinjalizime se pushtetari vendor abuzonte me detyrën, dhe kishte vendosur të kryente skenarin për të provuar dyshimet sipas saj përmes një investigimi.
“Kisha dëgjuar dhe marrë informacione se zyrtarë të tillë kryenin veprime në shkelje të funksionit, përfshirë edhe Gjicin. Vendosa të bëj një investigim, nuk kisha aspak qëllim të përfitoja tender apo ndonjë favor të tillë. Doja vetëm të faktoja se si zyrtarët e lartë abuzojnë me detyrën”, tha Kaçi në gjyq.
Safet Gjici tha se skenari është i sajuar duke mos kursyer as akuzat. “Nuk ka asnjë fakt, asnjë provë, asnjë firmë a vendim që të provojë se e kam kryer veprën penale. Është çështje e sajuar nga ushtarë politik”, tha Gjici.