Shpesh dëshira për një jetë më të mirë e çon shumicën e të rinjve drejt rrugëve pa krye. Madje, ka edhe shumë familjarë që në kushte ekstremisht të vështira në Shqipëri, që lidhen me mungesën e “dritës në fund të tunelit”, puna, të ardhurat, por edhe e ardhmja në tërësi synojnë me çdo mjet e rrugë t’i nisin fëmijët jashtë vendit.
Greqia nuk shihet më si një destinacion. As Italia nuk është më në preferencat e shqiptarëve. Gjermania, Anglia dhe vendet nordike janë synimi më i parë, më pas çfarë fati sjell.
Por, ajo që dihet me saktësi të paktën deri tani lidhet me familjet shqiptare, që i nisin djemtë e tyre të mitur ilegalisht në Britani për të punuar si trafikantë droge për grupet shqiptare të krimit të organizuar.
Burime nga Policia shprehen se shumica e djemve dhe të rinjve shqiptarë trafikohen në Britani me dëshirën dhe bashkëpunimin e prindërve të tyre, me premtimin se do të fitojnë shuma të mëdha parash nga trafiku në një kohë të shkurtër. Para me të cilat jo vetëm do mbajnë veten dhe vënë “diçka mënjanë”, por ndihmojnë edhe ata që kanë mbetur në Shqipëri.
“Trafikantët dhe shfrytëzuesit u premtojnë atyre para, shumë para, dhe një punë. Kur djemtë janë minorenë u premtojnë strehim, veshje dhe çdo gjë që mund të kenë nevojë”, thotë një burim anonim i policisë.
Ndërsa, Tamara Barnett, përfaqësuese e Fondaconit për Trafikimin e Qenieve Njerëzore sqaron edhe arsyet pse prindërit pranojnë të trafikojnë fëmijët e tyre, duke thënë se ka një ndjenjë të përgjithshme të mungesës së shpresës në Shqipëri. Një në dy gra dhunohen dhe këto shifra janë edhe më të lartë tek fëmijët.
Familjet duan t’i përdorin fëmijët e tyre për të fituar para, ose duan t’i japin fëmijëve një të ardhme më të mirë jashtë vendit të tyre, por më pas kur ata vijnë këtu jo çdo gjë shkon mirë.”
Të dhënat e gjykatave britanike tregojnë se pjesa më e madhe e adoleshentëve shqiptarë, të trafikuar Britani më së shumti përmes kamionëve janë kapur nga policia duke trafikuar drogë, nga sasitë e vogla deri në sasi me vlerën e 200 mijë paundëve.
Grupet kriminale i rekrutojnë të rinjtë shqiptare përmes reklamimit të jetës së tyre luksoze në rrjetet sociale. Një shembull i tillë është banda kriminale “Hellbanianz” e vendosur në jug të Londrës, shkruan Shqip.
Ata përdorin rrjetet sociale për të bërë rekrutime të reja, duke i dërguar mesazhe të rinjve ku reklamojnë suksesin e tyre me paratë, makina e reja, purot, vajzat dhe bizhuteritë.
Këto banda, çdo javë, janë në faqet e para të gazetave pasi kapen nga policia duke trafikuar sasi të mëdha droge direkt nga Amerika Latine në Britani.